طبعا كتير مننا عنده سكراب من اللي بيتباعوا في الصيدليه او the body shop او bath and body works او او او .. خوخ بقا ومشمش وخشب معرفش ايه وخليط ايه وبتاع لكن الحاجات دي بتكون زيها زي اي مستحضرات تجميل بتنعم وكل حاجه لكن بيكون فيها مكونات زي الـ parabens والجسم طبعا بيمتصه وده اكتشفوا انه ليه اضرار كتير جدا وممكن تعملوا سيرش عليها ومكونات تانيه غيره كمان والجلد يمتصها
مفيش احسن من الحاجات الطبيعيه واي حد بيجرب الحاجات الطبيعيه مش بيرجع تاني ابدا للحاجات التانيه والموضوع بسيط يعني مش معقد
طيب نبدأ في الموضوع وفي اخره هقولكم كام فكره للسكراب بسيطه ومن البيت طبعا
ايه الفرق بين سكراب الملح والسكر ؟؟؟ ايه الصح استخدامه ؟؟؟
الموضوع ده بيتوقف علي ( المكان ) اللي هتعمليله سكراب يعني ايه .. هقولك كملي معايا يا فتوكه
اول حاجه هنبتدي بيها هي
سكراب الملح
لازم نركز اننا نستخدم ملح البحر مش الملح بتاع الاكل يا قمرات .. وده انا معرفش مكان ليه غير نفرتاري وبيكون ساعات مضاف ليه روائح وفيه منه من غير اي حاجه ونفرتاري احلي حاجه انهم حاجتهم كلها مكونات طبيعيه واسعارهم مش غاليه للدرجه
طيب ايه فايده ملح البحر ده اساسا ؟؟
بيشيل السموم من الجسم وممكن يستعمل كـ مساعد لارتخاء العضلات وطبعا الوظيفه اللي احنا بنتكلم عنها ك سكراب
لكن لازم ناخد بالنا حبايبي انه خشن جدا ع الجسم ومينفعش نستخدمه في اي مكان .. طيب نستخدمه فين ؟؟
الاماكن في جسمنا اللي الجلد فيها سميك ومش ناعم ولا حساس .. زي ركبتك .. كعبك .. الكوع .. لو الاماكن دي عندك مش سميكه وحساسه بردو يبقا بلاش منه خالص .. لو جسمك حساس من الملح والمواد دي اصلا يبقا بردو بلاش منه وممكن تستخدميه للكعب فقط لا غير
وانا عن نفسي مش بفضل استخدم سكراب فيه ملح لان جلدي حساس منه وممكن استخدمه كل شهر مره مثلا مش اكتر من كده خااااالص
تاني حاجه سكراب السكر
ونستخدم هنا السكر الخشن من الناعم خالص ده زي بتاع الاسره وكده لا عايزين التاني .. ميزته انه اخف كتير من الملح ونقدر نستخدمه في جسمنا عادي وممكن الوش كمان وميزته انه بيقعد يدوب معاكي لحد ما يكون وصل المكان اللي بتعمليه لنعومه فظيعه كده
بس حبايبي اللي وشها حساس تستخدم السكر الناعم خاااالص ده عادي مفيش مشكله لان السكر الخشن ممكن يعملها التهاب وحاجات كتير احنا في غني عنها يعني بردو لازم تكوني واخده بالك نوع بشرتك ايه يستحمل ايه وايه لأ
تمام انا كمان ضهري حساس جدا لازم استخدم نوع سكراب ناعم مش خشن لما عملته بسكراب خشن شويه بسيطه وكنت ملياه زيوت طبعا كان اول مره اجربها ولقيت ضهري بقا من نعومته ايدي بتتزحلق عليه وحاجه كده جميله بس بعدها لقيت من فوق طلعلي حبوب كتير جمب بعض وانا مكنش بيطلعلي في ضهري خالص
ف لازم نركز كويس اوي ومنستخدمش اي حاجه كده ونشوف المكان ده يستحملها ولا لأ انا بقيت استخدم الخشن لكل جسمي ماعدا ضهري ووشي والمنطقه المحتاسه طبعا
طيب نستخدم الاسكراب كل قد ايه ؟؟
الموضوع هنا مش ثابت بمعني ان سكراب السكر ممكن تستخدميه لحد 3 مرات في الاسبوع لو حبيتي لو مكنش جلدك حساس جدا زي ما قولت .. بالنسبه للملح مره واحده اسبوعيا مش اكتر من كده
آخر حاجه كام طريقه للسكراب
اول حاجه سكراب للشفايف
وده انا بحب اوي يكون بالسكر البودر للشفايف
لانها مكان حساس جدا ونحط عليه زيت زي جوز الهند مثلا او اللوز الحلو او الجوجوبا
ونعمل بفرشه سنان سوفت تكون مخصصه للشفايف فقط ونعمل براحه خاااااالص بلاش عنف لدقايق فقط وبعدين تغسليهم وتحطي مرطب
تاني حاجه
عندك موزايا بائسه محدش بيقربلها عشان استوت اوي طيب حلو جدا هاتيها واهرسيها بشوكه مثلا وحطي عليها 3 معالق سكر وعليهم زيت عطري باي ريحه تحبيها او ممكن بلاش منه خالص زي ما تحبي
وانتي بتاخدي شاور اعملي بيه جسمك كله وبعدين اشطفيه بمايه دافيه وادعيلي
وممكن تستخدمي بدل الموز فراوله لو عايزاه يكون اقوي شويه كمان
تالت حاجه السكر البني
تحححححححححححفه بجد بحبه جدا حطي كميات متساويه من السكر البني والزيت اللي تحبيه وانا بحب زيت جوز الهند وبيبي اويل او زيت زيتون براحتك خالص وعليهم بردو زيت عطري لو تحبي بيخلي ريحه جسمك واااااو ^_^
آخر حاجه الملح
وده زي ما قولت بديه ترتيب بعد السكر وخاصه لو حاسه ان جسمك مرهق وتعبانه بعد يوم طويل وعايزه تريحي جسمك بيخليكي تبقي ريلاكس .. حطي كميات متساويه بردو من الملح والزيت اللي تحبيه وعليهم نص معلقه عصير برتقال ونص معلقه عصير ليمون او معلقه كامله من واحد فيهم براحتك بس هتفرق كتير
انا كده خلصت يا قمرات ويارب الموضوع يفيدكم وبلاش تقروا وتخرجوا بحس باحباط فظيع لما يحصل كده بجد
0 comments
إرسال تعليق